Ein leið til að sporna við atvinnuleysi

Enn eitt gott mál frá ríkisstjórninni. Hér er á ferðinni skynsamleg leið til að hvetja einstaklinga fyrirtæki og stofnanir til að ráðast í viðhaldsverkefni og aðrar framkvæmdir. Fyrir var endurgreiðslan tæp 15% af heild, en verður nú 24,5% af heild. Breytingin gerir að verkum að ódýrara verður að ráðast í framkvæmdir og verður vonandi til þess að iðnaðarmenn og aðrir sem koma að nýbyggingum og viðhaldi, haldi vinnunni og ráðist verði í verkefni sem ella hefðu ekki orðið.

Frumvarp um endurgreiðslu virðisaukaskatts að lögum

Athugasemdir

[Sigurður Þorsteinsson, 7.3.2009 kl. 08:19]

Ólafur þetta er eitt skref, en þegar við erum að tala um 14.000 manns atvinnulausa þá þarf nú gott betur en þetta. Áhugavert væri að heyra frá þér, hvaða tillögur þú hefur til þess að taka á vandanum, annað en álver.

[Ólafur Þór Gunnarsson, 8.3.2009 kl. 15:21]

Sæll Sigurður. Eins og ég heff bæði skrifað um áður og bloggað, þá eru þó nokkrar leiðir færar í atvinnusköpun.

Við getum notað rafmagnið okkar og aðra innlenda orkugjafa til að framleiða grænmeti, með slíku mætti skapa hundruð starfa á landsvísu, með mun minni tilkostnaði en stóriðju. Niðurgreitt rafmagn í þessu tilliti væru skynsamlegra en margt annað.

Við getum flutt aftur inn í landið þá lyfja framleiðslu og vökvaframleiðslu sem hefur verið flutt héðan, og var ekki send úr landi vegna þess að hún bar sig ekki heldur vegna þess að ekki var nógu mikið á henni að græða. Aftur tugir ef ekki á annað hundrað störf. (Í dag flytjum við inn um eða yfir 500 tonn af  vatni til að gefa í æð en fyrir 15 árum var öll þessi framleiðsla hér heima)

Við getum sett meiri áherslu á græna ferðaþjónustu, bæði með eflingu þjóðgarða og stækkun, og með markvissri vinnu með ferðaþjónustu aðilum. Ég tel að græn ferðaþjónusta muni á næstu árum skapa hundruðir starfa.

Með lækkun vaxta, lækkun verðbólgu og afnámi verðtryggingar búum við í haginn fyrir fjölskyldur og atvinnufyrirtæki til að hafa svigrúm til að skapa fleiri störf.

Með aukinni áherslu á vinnslu sjávarafla innanlands er hægt að halda í mörg störf, og skapa ný.

Með aukinni áherslu á heimaþjónustu og heimahjúkrun má skapa hundruðir starfa, með litlum tilkostnaði, og um leið sparast milljarðar í fjárfestingum í dýrum hjúkrunarrýmum. Það sem meira, er fólk fær þjónustu þangað sem það vill fá hana.

Þannig mætti lengi telja, en eins og sést eru víða tækifæri, við megum bara ekki láta drauminn um stóra "vinninginn" villa okkur sýn eða flækjast fyrir.