Sjálfbær atvinnustefna

Nokkuð hefur borið á því að undanförnu að menn hafi kallað eftir hugmyndum VG í atvinnumálum, og kvartað undan því að VG hafni hugmyndum um stóriðju sem lausn á atvinnuleysi. Hér eru nokkrar hugmyndir mínar þar um, og það mætti telja fleiri. 

 

• Við getum notað rafmagnið okkar og aðra innlenda orkugjafa til að framleiða grænmeti, með slíku mætti skapa hundruð starfa á landsvísu, með mun minni tilkostnaði en stóriðju. Niðurgreitt rafmagn í þessu tilliti væru skynsamlegra en margt annað. Eins getum við gert með aðra orku til innlendrar matvælaframleiðslu.
• Við getum flutt aftur inn í landið þá lyfja framleiðslu og vökvaframleiðslu sem hefur verið flutt héðan, og var ekki send úr landi vegna þess að hún bar sig ekki heldur vegna þess að ekki var nógu mikið á henni að græða. Aftur tugir starfa. (Í dag flytjum við inn um eða yfir 500 tonn af  vatni til að gefa í æð en fyrir 10 árum var öll þessi framleiðsla hér heima)
• Við getum sett meiri áherslu á græna ferðaþjónustu, bæði með eflingu þjóðgarða og stækkun, og með markvissri vinnu með ferðaþjónustu aðilum. Ég tel að græn ferðaþjónusta muni á næstu árum skapa hundruðir starfa.
• Með lækkun vaxta, lækkun verðbólgu og afnámi verðtryggingar búum við í haginn fyrir fjölskyldur og atvinnufyrirtæki til að hafa svigrúm til að skapa fleiri störf.
• Með aukinni áherslu á vinnslu sjávarafla innanlands er hægt að halda í mörg störf, og skapa ný.
• Með aukinni áherslu á heimaþjónustu og heimahjúkrun má skapa hundruðir starfa, með litlum tilkostnaði, og um leið sparast milljarðar í fjárfestingum í dýrum hjúkrunarrýmum. Það sem meira, er fólk fær þjónustu þangað sem það vill fá hana.
• Með 100% endurgreiðslu virðisaukaskatts af viðhaldsframkvæmdum, sem nýlega var samþykkt á Alþingi, skapast mörg störf.

Þannig mætti lengi telja, en eins og sést eru víða tækifæri, við megum bara ekki láta drauminn um stóra "vinninginn" villa okkur sýn eða flækjast fyrir. Við verðum að láta af forsjárhyggjunni sem felst í því að koma með stóru patentlausnirnar. Við eigum að hlú að hugmyndum og tillögum með stuðningi við nýsköpun og leggja sérstaka áherslu á hugmyndir sem byggja á sjálfbærri þróun. Þrátt fyrir allt er ódýrara og auðveldara að skapa störf í litlum og meðalstórum fyrirtækjum heldur en að bíða eftir því að draumurinn um einhverja stórverksmiðju rætist.

Athugasemdir

[Sigurður Haukur Gíslason, 27.3.2009 kl. 23:22]

Flytjum við inn vatn?? Getum við ekki eimað/sótthreinsað vatn sjálf, burt séð frá góðæri eða kreppu?

Lýst vel á grænmetisræktunina. Svo þegar við verðum komin í Evrópusambandið þá getum við flutt út grænmeti og aðrar landbúnaðarvörur. Evrópa er mjög stór markaður.

[Ólafur Þór Gunnarsson, 28.3.2009 kl. 12:08]

Já Sigurður, fyrir 8 eða 9 árum var ákveðið að hætta með alla innlenda vökvaframleiðslu m.a. vegna þess að ríkið vildi spara sér kostnað af birgðahaldi. Við þessa aðgerð töpuðust nokkrir tugir starfa úr landi, og öryggissjónarmið voru látin róa. Síðar kom náttúrlega í ljós að kostnaður við innflutninginn er ekkert minni en framleiðslan kostaði hér, og allur virðisaukinn tapast. Þessu þurfum við að breyta.

[JASi (IP-tala skráð) 28.3.2009 kl. 18:45]

Hvað allt er auðvelt, þegar einginn eru rökinn.

1 - Hvaða tryggingarfélag vill standa á bakvið slíka framleiðslu. (þegar hægt er að tengja dauða sjúklings til vatnsins)

2 - Höfum við svona frábæra gróðurmold? Kostar svo ekkert að senda vöruna héðan til markaðsinns í evropu?

3 - Hverjir eiga að vinna fiskinn svona almennt hér á fróni? Útlendingar? Hverning á að semja við kvótamenn um þann afla sem á að vinna hér?